Rubha na Cananaich
Tha Rubha na Cananaich (Beurla: Chanonry Point)[1] no Gob na Cananaich[2] suidhichte eadar Ros Maircnidh agus a' Chananaich air costa an ear an Eilein Duibh. Tha an rubha a shìneadh anns an Linne Mhoireibh agus chithear Gearastan Dheòrsa air taobh eile na linne. 'S e aon de na h-àitichean as fheàrr anns an Rìoghachd Aonaichte gus muc-bhiorach (Tursiops truncatus) fhaicinn bhon tìr.[3] Tha iad a' tighinn glè fhaisg chun an tràghad, gu h-araidh aig tìde-mhara lìonaidh. Tha peileagan agus ròin ghlasa cumanta an seo. Chithear dòbhran (Lutra lutra) bho àm gu àm cuideachd.
Chaidh taigh-solais a thogail air ceann Rubha na Cananaich ann an 1846. Bha e air a dhealbh le Alan Stevenson. Tha e 13 m a dh'àirde. Ann an 1984 chaidh dòigh-obrach an taighe-sholais atharrachadh gu fhèin-obrachail agus tha e fo chùram den Northern Lighthouse Board a-nis.[4]
Tha clach-chuimhneachain Choinnich Odhair air an rubha, am fear a tha ainmichte cuideachd mar the Brahan Seer. A rèir beul-aithris chaidh a mharbhadh an seo le Lady Seaforth ann an 1660 air sgàth 's nach bu toil leatha na fàidhireachdan aigesan.[5] Tha dà làrach campaibh faisg air an rubha agus tha a' chuid as motha den rubha a' gabhail a-steach an raon-goilf Fortrose and Rosemarkie Golf Club.
Iomraidhean deasaich
- ↑ “Rubha na Cananaich/Chanonry Point”. Ainmean-Àite na h-Alba. Air a thogail 12mh dhen Iuchar 2017.
- ↑ Mac an Tàilleir, Iain (2003): “Ainmean-Àite”, td. 28. Air a thogail 12mh dhen Iuchar 2017.
- ↑ “Our dolphins, birds and other wildlife” (Beurla). Black Isle Info. Air a thogail 12mh dhen Iuchar 2017.
- ↑ “Chanonry” (Beurla). Northern Lighthouse Board. Air a thogail 12mh dhen Iuchar 2017.
- ↑ “Chanonry Point” (Beurla). Gazetteer for Scotland. Air a thogail 12mh dhen Iuchar 2017.
Dealbhan deasaich
-
Clach-chuimhneachain Coinneach Odhar -
Taigh-solais Rubha na Cananaich
Ceanglaichean a-mach deasaich
- Iomraidhean nam mapaichean airson comharradh-clèithe: NH749557
- Dolphin Pictures and a Movie at Chanonry Point
| Bailtean | Abhach • Am Blàr Dubh • A' Chananaich • A' Mhanachainn • An Todhar • Cromba • Drochaid Sguideil • Poll Lochaidh • Ros Maircnidh |
| Uisgeachan | Abhainn nam Manach • Abhainn Chonainn • Linne Chrombaidh • Linne Mhoireibh • Linne Fharair |
| Àitichean sònraichte | Eaglais Chille Mhìcheil • Camas Uadail • Tarbhdail • Rubha na Cananaich |